قسم ونصيب _ للشاعرة / زينب سليم أحمد ،،💚💜💙❤️
**************************
اوعى تفكر يوم نتلاقى . . ولاتقول دي قسم ونصيب
اصل قلوبنا كتير مشتاقة . . بسببها عقلنا هايغيب
إوعى تصدق ولا تفكر . . إن ملايكة تعيش ع الارض
اصحى تملي ياعقلي وسيطر . . لاغرامك سنة ولا فرض
وانت ياقلبي اهدى شوية . . اعقلها مرة في حياتك
وأوعى تفكر بالحنية . . سهل ترجع كل ما فاتك
ياما قلوب ضيعت أحباب . . وطريقها كان آخره ندامة
وقت ما تاه العقل وغاب . . ولا شافوا بعديها سلامة
إفهم واتعلم من غيرك . . ليه بتجازف ولا تجرب؟؟
قول لحبيبك كتر خيرك . . واهرب منه إوعى تقرب
لو هتقرب يبقى هاتتعب . . وتقضي حياتك ندمان
لكن لو تبعد راح تكسب . . راحة بالك والروقان
لو هتقرب يبقى اتحمل . . إن تعيش العمر حزين
شك وغيرة وبرضه مكمل . . جوا ف قلبك حيرة سنين
اياك لحظة ياقلبي تخيب . . او تتمسك بقصص خايبة
وتقول يمكن مرة تصيب . . بس بتلقى حبالهم دايبة
ليه تتمسك باللي يسيبك؟ . . أو تسمح له يعيد الغلطة
لو ترضى بالغدر نصيبك . . يبقى ياقلبي وقعت في ورطة
===============================
بقلم // زينب سليم أحمد ✍️
