قلبي أنا طيب __ بقلم / زينب سليم أحمد 💚💜💙❤️
=================
كتير دورت في الدنيا على الراحة ملقياشي
وياما عملت أنا خاطر لناس أصلا ماتسواشي
و بتألم و بتعلم من اللي بشوفه في حياتي
لكن قلبي أنا طيب ومهما بشوف ما بقساشي
وناس ياما كانوا أصحاب ووقت الشدة باعوني
قسمت الخير انا معاهم بقلة أصل خانوني !!!
لا صانوا الود والمعروف ولا عيشي ولا ملحي
وداسوا عليا وبجبروت . ولما زعلت لامووووني
وناس سكنتهم قلبي وقولت دا هما دول ناسي
ويجوا عليا بزيادة وانا اللي براضي وبواسي
ومهما سمعت أنا منهم كلام جارح أنا بسامح
وشهد كلامي أسقيهم . . ويسقوني مرار كاسي
وكان ربي عالم بالحال كشفهم بعد طول عشرة
وزال الغيمة من عيني ومعدنهم طلع قشرة
وعوضني بناس تانية تصون ودي وتحميني
وقلبي فرح بطلتهم وحس الراحة والبشرى
======================
بقلم / زينب سليم أحمد ✍️
