بعد الفراق بقلم الشاعرة/ زينب سليم أحمد 💚💜💙
=================
هو مين اللي ماسلم قلبه مرة للهوى ؟؟
والفراق ما حسه يوم ولا بناره انكوى
ونعيش على ذكرى اللي فات والقلب
مليان بالآهات لكن بنهرب م الدوا ..!!!
كل شيء بعد الفراق بيبقى عادي
حزن وفرح فشل نجاح بتشوفه هادي
وتلاقي قلبك جوا منك بينكسر
وبتنفصل عن الوجود وتحسه فاضي
اي شيء بعد الفراق بيبقى مر
والعمر كله يكون تقيل رافض يمر
حتى اللي كان بيفرحك ويا الحبيب
فجأة تلاقيه أدام عينيك مبقاش يسر
واتحولت كل الفصول . صبحت خريف
بتقوي في الناس كلها وجواك ضعيف
حتى الحياة ألوانها فجأة بتختفي
وبينطفي فيك الأمل يصبح كفيف
وتعيش حياتك كلها على ذكرى فاتت
تيجي تصحي اللهفة فيك تلاقيها ماتت
واللي ربط نبض القلوب بينا زمان
بينتهي قبل الأوان . . وحباله دابت
يومها تحس الصبر ليك طوق للنجاة
تهدى وتنسى كمان دي نعمة من الإله
ماهو غصب عنا اللي انكتب لازم يكون
وان الفراق زي اللقاء . . . سنة حياة
==========================
بقلم / زينب سليم أحمد ...✍️