هارسم دنيا جديدة _ بقلم / زينب سليم أحمد 💚💜💚💜
قولت لروحي أنا ليه ما ارسمشي
زي ما غيري رسم أحلامه
هارسم واحلم وماهزهقشي
هارسم عمري بكل أيامه
ارسم ورده جميلة و غصن
ارسم روح محتاجة لحضن
واكتب اسمي فى نص اللوحة
علشان روحي شبعت حزن
تاهت مني وأنا مش حاسه
ومانيش عارفه ارسم تاني
كل مابرسم القاني لسه
من أحوالي تملي بعاني
قولت أنا هارسم قلب سعيد
نبضه بيضحك أوي متهني
حس الفرحة كأنه فى عيد
كل الدنيا معاه بتغني
وارسم عين متفائله ببكره
يجي معاه أحلام وأماني
يمسح كل مرار الذكرى
مايخليش ولا حد يعاني
هارسم روح بتصادف روح
داويت بيها آلام وجروح
راضيه تكون لها زي الضل
تبقى معاها منين ماتروح
هارسم اول حب أنا عشته
قلب حافظت عليه وأمنته
وارسم صورة روحي وروحك
بعد ما قلبي ارتاح من حيرته
هارسم ايد بتفارق ايد
قلب شباب مليان تجاعيد
وعيون تحلم تلقى الفرحة
من غير دمعة ولا تنهيد
هارسم بلدي فى كل الصورة
راية ترفرف أوي منصورة
هارسم كوبري ونيل مع جسر
رفرف فوقه علم فيه نسر
هامسح ضحكه خبيثه و زور
وارسم ضلمه فى عز النور
ارسم بلدى وارضي البور
هارسم عمر كمان متسرسب
على شىء غامض أو مجهول
قلب يخاف وكمان بيكركب
مستنيه على جسر وصول
هارسم نسمة ، وارسم قسمة
هارسم فرحه جميله وحلوة
ووشوش دايما كدا مبتسمة
تحلم يوم . . هتشوف النور
وارسم بيت كان يوم عمران
لف زمانه . . صبح مهجور
ارسم قمح وخير وسنابل
وقلوب ع الود بتتقابل
هارسم أملي وحلمى لبكرة
وامحي كل آلام الذكرى
هارسم قلب حزين مكسور
عاش يحلم بالخير مبدور
كان يتمنى يكون له حبيب
بس حبيبه طلع مغرور
هارسم دنيا جديدة عليا
كل حدودها صنع إيديا
حتى إن كنت هاعيشها لوحدي
بس ماشوفش دموع ف عينيا
________________________
بقلم/ زينب سليم أحمد