في 60 ألف سلامة/ بقلم الشاعرة / زينب سليم أحمد 💚💜
. {{ في 60 ألف سلامة }}
===================
عارف يومها أنا ايه غيرني؟؟
لما سألتني بتخيرني ..!!!!
لانا للدنيا .. وانت الدنيا ..!!
ولو أن سؤالك حيرني
بقى معقول جاي لسة بتسأل
فكرتك واثق . . . وبتتقل
عمر خيالي ما صور ليا
انك يوم راح تيجي عليا
أو بسهولة كمان تخسرني
معقول بعد العمر دا كله
فكرك قلبي ضعيف هاتذله
وتحددله كمان وتدله ..!!!!
يكره مين ويحب ف مين
يانهار اسود زي الطين ..!!
هوا انت بتتكلم جد .. ؟؟
لأ وكمان بتكمل عد .!!!
دانت غرورك فاق الحد
وكلامك والله محسرني
من امتى بتديني أوامر
من غير ولا قول ولا تفسير
وعشان تبقى الناهي الآمر
لازم قبلا . . تقول تبرير
شرط كمان لازم يقنعني
وتقدرني . . . وهاتسمعني
مش تتعصب وتكدرني
كدا يا حبيبي دا يبقى كتير
مانت عارفني كمان عنادية
لازم اعرف ايه أسبابك
وها نتناقش . . . وبجدية
وهتاخد راحتك في عتابك
لكن تتكبر . . . . وهاتشرط
وتبين . . . . . للمكر علامة
يبقى لعبت في عداد عمرك
ولا فيه بينا عتاب وملامة
وامشي وهد وراك 100 معبد
وانا ولا حاسة عليك بندامة
هكتب غنوة جميله واقولك
روح . .. وف 60 ألف سلامة
===================
بقلم / زينب سليم أحمد ✍️
