إسعى للخير __ بقلم الشاعرة/ زينب سليم أحمد 💚💚💚
==================
شمسنا هلت . . ع المخاليق
زاحت كل سواد أو ضيق
قالت ليه هانخاف من بكره
طول ما إيماننا لينا صديق
سلم امرك . . . كله لربك
تلقاه حدك . . دايما جنبك
طول مابتسعى عشان ترضيه
تلقى الراحة سكنت قلبك
حب لغيرك . . اللي تحبه
ليه تتخانقوا او تتعاتبوا ؟؟
دا يابخت اللي يعيش بأمان
ولا كراهية . . دخلت قلبه
لما الحب . . مابينا يسود
نهزم اي خلاف . . وحدود
وقلوبنا . . . نرويها محبة
حبة بحبة . . . . الود يعود
افتح قلبك . . يرتاح بالك
إوعى تفكر في اللي جرالك
لو مقسومك راح ترضى به
للأفضل . . يتغير حالك .!!
خليك دايما ساعي لخير
وافرح برضه لفرح الغير
اللي هاتزرعه راح تجنيه
دا ربك والله عظيم وكبير
=====================
بقلم / زينب سليم أحمد ✍️
