قالي وقولتله // بقلم الشاعرة / زينب سليم أحمد 💚💚💚💚
==================
قالي ماشي . .قولت ماشي
قالي حبك أصله هادي ..!!!
حتى حاسه في التلاشي
قولتله طيب وعادي ..!!!
اعتبر أنه مجاشي ..!!!!
قالي يااه على تقل دمك
طب قوليلي . . لا بلاش
حسسيني اني أهمك ..!!!
وان قلبك . . . بيا عاش
والفراق موت وانتحار.
دمعيلك . . . . دمعتين
ابلفيني . . . . . بكلمتين
يمكن ارجع . . فــ القرار
قولي رح اجدد فــ نفسي
اهزمي حيرتي ويأسي
أنا قلبي حاسس باانهيار
حلفيني . . . باللي فات
قلًبي في الذكريات ..!!!!
قولي حبيت .. بإختصار
حسسيني . . بالاهتمام
سمعيني . . كتير كلام
هدٌي جمودك والحصار
قولتله دا فــ شرع مين ؟؟
المحبة تكون كلام ..!!!
في اي ملة ولا دين ؟؟
تسلخ حبيبك بالملام ..!!
ازاي ليا تملي تهدد ..!!
وانك يوم هاتسيبني وتبعد
وبحسك بايع مش همك
وكمان قاصد . . وبتتعمد
تختبر . . . صبري وحبي
شايفه فاتر ولا اتبدد ؟؟
جاي تنعش فيه وتجدد !!
حتى ولو هتزود غلبي
بتقول ماشي وبتتوعد.؟؟
فكر قبلا . استنى وسدد
مين اهتم . . وشال الهم
واكتب ياللا بذمة وعدد
للي عاشتلك زي الضل
ولا يوم كَلْت ولا بتمل
كنت حبيبه وكنت الأم
مهما فعالك كت بتشل
واصبر اقول معلش وماله
بكره مسيره يغير حاله
كنت بادادي ودا شيء عادي
اقول يمكن هيعود لوصاله
واما لقيت الحال بيحير
وانت مصر ولا بتتغير
سيبتك لضميرك وصبرت
وانت كمان اللي بتتآمر؟؟!!!
قال دا بايني جلبت لروحي
وخدتي هزاري بجد ياروحي
دانتي ياعمري نسمة قلبي
منين ما بتيجي ولا تروحي
زوجة جميلة وست أصيلة
لميتي شملي وشمل العيلة
أمل حياتي اللي مسهرني
معاه فــ ألف ليلة وليلة
هاتي ايديكي تلمس ايديا
هاتي عنيكي تحضن عنيا
ياللا ياشمس القلب وضله
نعيش سوا . . الحب كله
مانتي لقلبي كل اللي ليا
قولت وماله يانن العين
كل كلامك . . . حلو وزين
بس ياريته يكون من قلبك
مش اللي طلبه المستمعين
مش محتاجة اسمع فــ أغاني
بس تقدر . . . . لما بعاني
واما فكري يتوه أو بشرد
تيجي تقول دا خلاص بيعاني
يوم ما تقدر أنا راح أقدر
ولا هنظن بسوء ونفكر ..!!
وتبقى حياتنا مثال لمحبة
كل مانكبر . . . . هي بتكبر
====================
بقلم/ زينب سليم أحمد ✍️