عزت أخويا _ بقلم الشاعرة / زينب سليم أحمد 💚🤍
==================
عزت اخويا ..... كان إنسان
مالي حياتنا .....فرح وأمان
عمر الحزن ف عينه مابان
حتى وهو .. خلاص بيموت
كان منبع ... حنية وطيبة
دمعة عينه ... تملي قريبة
عمر لسانه ماقال العيبة
ولأحبابه ما علا الصوت
ولأنه محبوب .. من ربه
كانت الناس كلها بتحبه
يسألوا عنه لو غاب عنهم
وبيفرحوا لو بس يفوت
فجأة وقع وبضربة قوية
صابت كبده بقيت مهرية
ولا بقى نافع له عملية ..!!!
وأيامه .. المعدودة بتفوت
عاش صابر .. واتحمل المه
كان بيموت لو بكيت أمه
يتبسم .... ويخبي آلامه
ويداري ف وجعه لتموت
واللي عمره مابكى عنينا
وعاش يسندنا ..... ويقوينا
فارق داره .. وعشنا بناره
دوقنا الحسرة بطعم الموت
يامجمع قلبنا .. على حبك
ومدمع الروح . . . بفراقك
قولي مين عرفك وما حبك
وانت الناس حلفت بأخلاقك
بدعيلك ..... ليلي ونهاري
إن الجنة ... تكون مثواك
ياللي كنت ... سندي وداري
مهما تغيب على طول فكراك
نام ياحبيبي خلاص وارتاح
عايشين على حسك والسيرة
كنت مداوي في روحي جراح
كنت لكسرة قلبي .... جبيرة
====================
بقلم / زينب سليم أحمد ✍️
