شريط الذكريات _ بقلم الشاعرة / زينب سليم أحمد 💚
==================
المكان . . . نفس المكان
والقلوب . . مبقيتش هي
مكان بحس فيه بأمان
لذكرى شايلها فيه بإايديا
الاماكن . . . ما بتتغير .
اللي بيتغير . . إحساس
لما تروحها اوام تتحير .
اكمنها . . أوفى م الناس
ونسيمهم موجود بتشمه
وبتتجرع . .مره وسمه
وبتمنع . . . دمعك وتلمه
قبل ماقلبك يشمت فيك
اكمنه في مرة اتحداك ..!!!
انك صعب تروح لهناك
او تتحمل . . . مر آساك
اللي مسهر دمع عينيك
أيام واقفة ومش بتعدي
وافكار بتجيبك وتودي
بس دخلت معاه ف تحدي
وخنقت حنينك بإيديك
وأما تمر بنفس السكة
تحس بايده ف ايدك ماسكة
تضغط بالتانية وتتكى
على جرحك الساكن فيك
وبتتحمل . . بس مكمل
ترسم بسمة عشان تتجمل
تتلفت بعينيك تتأمل
شريط الذكرى يمر عليك.
وبتسترجع كل كلامه ..!!
حتى عتابه معاك وملامه
وتلقى ايديك حنت لسلامه
ويهيم طيفه اوام حواليك
تدفن احساسك جواك .. !!
وتقنع روحك أنه اذاك
تحلف إنه محال يلقاك
وانت مخبيه جوا عينيك .!!
الاحساس مش بس قلوب
دي اماكن بتشوفها تدوب
على جدران عمرها مكتوب
اسم أعز الناس كانوا ليك
تهرب وتسيبلها . . أماكنها
والروح لسه بشوقها ساكنها
تدعي ربك . . . إنه يعينها
أنها تنسى . . أوام الذكرى
وانت مكحل بيها عينيك
انت مكحل بيها عينيك ..!!!
====================
بقلم / زينب سليم أحمد ✍️