أنا المصري ... بقلم الشاعرة/ زينب سليم
♡♡♡♡♡♡♡♡♡♡♡♡♡♡
انا المصري ..... سابق عصري
وحبي ليكي ..... كان حصري
فداكي روحي ........ يابلادي
وموتي عشانك .... يوم نصري
أنا القمحة ف رغيف عيشك
انا جناحك ........... انا ريشك
وعدوك لو ....... لمس أرضك
أكون مدفع في ايد جيشك
على أرضك ...... انا الحارة
وفي بحورك ....... انا منارة
ولو خاين .......... يقربلك
اشن ف ثانية .... 100 غارة
انا ابنك ........ وها ابنيكي
وابيع عمري ...... فدا عنيكي
وبدعي كتير ...... وانا ساجد
ياخد من عمري ....... يديكي
انا قمرك ..... وشمس نهار
انا نيلك ..... ربيع وخضار
ولو حواليكي .... 100 نوة
هيبقى قلبي ..... ليكي فنار
ولو في الغربة .... بتكفى
اردد اسمك ............ اتدفى
وشربة ميه ........ من نيلك
دي احلى م العسل .. واصفى
يانبع المية ......... للعطشان
يانور وهداية ...... للحيران
يافاتحة ...... للغريب بابك
يعيش فيكي ..... بكل امان
على كفي ... حروف اسمك
وعايش لجل ... أزيل همك
طبيبي وصفلي .. رسم القلب
لقيت القلب قام رسمك ..!!!!
☆☆☆☆☆☆☆☆☆☆☆☆☆
بقلم/ زينب سليم أحمد
