الواد حنكورة 💥 بقلم الشاعرة زينب سليم
الواد حنكورة .. أبو دراع
استاذ فــ السرقة وله باع
ولا تعرف أصله ولا فصله
لكن إسمه فــ السما ذاع
دا حرامي عينه على قولنا
استاذه جنبه سرق قوتنا
ومعاهم شيخ منصر تالت
جاهز هاينط على بيوتنا
يتسحب جنبك ولا تدرى
وتفكره معجب راح يقرأ
واتاري البيه بيفك الخط
وبيحلف .. عجباه الفكره
وبكل بجاحة يزيح راسمك
وبينسخ اسمه مكان اسمك
فرحان بكلام الناس عنه
ولازقلك قال ايه بيدعمك
ويوماتي ينزل في نصوص
الواد عبقري أصله المحروس
زي النحلة .. في المنتديات
وبيتكرم .... ابن الموكوس
ولا همه .. تهزيق وفضايح
ويوماتي بياخد فــ طرايح
تلقاه بيطنش .... ولا همه
وجبلة الكيل منهم طافح
داحرامي اصله الواد حنكش
شغلانته بيخطف وبينتش
ويوماتي بينسخ وبيلزق
عايش بس لجل ما ينكش