نفس الغلطة 💥 بقلم الشاعرة زينب سليم أحمد
««««««««««««««««««««««
عمرك حسيت روحك هايمة
تايهة وبتحلق في الملكوت ؟؟
وبتتظاهر ......... إنها نايمة
مع انها مستسلمة للموت ...!!
وساعات تلاقيها تقاوح فيك
ولا مع الدنيا بتيجي عليك
والأقرب ليك صارو أعاديك
بيذموا فيك وبعلو الصوت
وتلاقي روحك فجأة تروح
ويحن القلب يقوم مفتوح
ولحاله يداوي آلام وجروح
كان شاكك يوم إنها هاتفوت
وأوقات الروح بتكون شاكة
إنها عاشرت ..... أرواح ساكة
معظمهم ...... قاعد ع الدكة
مستني دوره يجيه مظبوط
والماتش بيخلص في ثواني
مش فارقة الأول م التاني
طول ماحنا عايشين بنعاني
ونشوف م الدنيا كتير جبروت
أرواحنا صافية ........ وبريئة
لو شافت .... أزمات أوضيقة
تلاقيها هادية ......... ورقيقة
وأملها في ... الدنيا زغنطوط
عمرك حسيت انك في مكان
ولا تشبه فيه ...... أيها انسان
والأخلاق فيه أشكال وألوان
والعاطل فــ الباطل ... مغلوط
او روحك ..... غرقانة فــ نوة
وهمومك ..... كسراك من جوا
ولا فارقة ......... آدم من حوا
طول م بقدرك الأسود مربوط
وتشوف روحك واقعة فــ ورطة
بتعيد وتزيد .......نفس الغلطة
وبتعجن احزانها .... فــ خلطة
مع باقي عمر .... كمان مكبوت