أنا نكدية ؟؟ بقلم الشاعرة/ زينب سليم أحمد
البيه بيقول ........ نكدت عليه
مع اني بلسم .... اوووي نسمة
هو انا يعني ......... زودتها ليه
دا يدوبك بس ..... 200 كلمة
طبعا اولها ......... سألت عليه
وسألته يعني ...... حلمت بإيه
واحكيلي اليوم .. ثانية بثانية
القاه بيقول ان انا ظالمة ..؟؟!!
فيها ايه لو روحت معاه مشوار
وعنيه لمحت ... واحدة جميلة
روحت انا عاملة قصة وحوار
وخناقة ..... وسهراية طويلة
وحلف بحياتي ....... وغلاوتي
انها ماتجيش .... ربع حلاوتي
وكفاية طيبتي ....... وشقاوتي
فاسكتت ........ وعديت الليلة
وبصحيه ........ زي اي صباح
لجل يقوم يفطر ....... ويروق
القاه بيقول حاضر ياسماح ..!!
خمسة ياحبيبتي وراح افوق
كان يوم اسود ... ومهبب طين
قولتله عرفني دي تطلع مين
وحلفلي يوميها ...... الف يمين
انها اخته ...... فاسكتت بذوق
البيه بيقول ........ نكدت عليه
مع اني طيبة ......... وكيوتة
كل ما أقفشه .... فجأة بلاقيه
بيقولي اهدي ....... يا كتكوتة
فاكر انه بكلمة ....... خلاص
راح أصدق .... كدبه البصباص
واضرب له اخماس ف اسداس
لما اجيب ...... اصل الحدوتة
واقفة له ع الواحدة يوماتي
ولا بعطيه فرصه........ يتلفت
ولا بسأل ....... مهما بيهاتي
مهما حالته ..... بتكون هبت
مانا لازم احافظ على حبه
ولايبقى غيري اللي ف قلبه
وساعات بيفرقع ... من غلبه
ويقول نكدية .. ياخواااااااتي
✍️ Zenab Seleem
