ماحبتهوش💥 بقلم الشاعرة/ زينب سليم أحمد
««««««««««««««««««««
قابلني صدفة .. واستغرب
بعد فراقنا ... شهور وسنين
اتبسم م الفرحة ..... وقرب
بنظرة ملانة شوق وحنين
لهفة صوته ... أنا فكراها
نظرة عينه ..كمان عارفاها
لفتاته ........ كلها فهماها
ماحنا زمان ... كنا حبيبين
مد ايديه قال إيه بيسلم
لمعت دمعة جوا فــ عينه
حسيتها هاتصرخ ، تتكلم
باللي زمان كان بيني وبينه
حسيته بنى آدم ..... عادي
احساسي كان فاتر هادي
مش عارفة ليه .... المرادي
حتى عيوني مش حاسينه
أتكلم ياما ... فــ كام موال
عن شوقه وحبه اللي قساه
ولا فاكرة كلمة م اللي اتقال
ولا فاهمة كلامه إيه معناه
سيبته يكمل ويقول ويعيد
وانا فكري وقلبي راح لبعيد
وأما لقيته ..... عمال بيزيد
قولتله أنا عندي معاد نسياه
ودعته .... ومشيت طوالي
حسيت اني حتى مشفتوش
مش عارفة ايه اللي جرالي
ولقيته حد .. أنا معرفتوش
وملامحه حسيتها غريبة
ولا فيها محبة ... ولا طيبة
يومها اتأكدت انا م الخيبة
اني بصراحة ... محبتهوش
