حجر صوان 🖤بقلم الشاعرة زينب سليم أحمد
♡♡♡♡♡♡♡♡♡♡♡♡♡♡
قالوا على قلبي ... حجر صوان
ولا عنده مشاعر ولا أحاسيس
مع انه منبع ...... شوق وحنان
نهر مشاعر لكن له ..... هويس
مش اي مشاعر ..بيصدق ..!!!!
لازم يتأكد ............ ويحقق
ويحس أمانه ........... ويدقق
إنه ما أمنش ..... حد خسيس
وعشان تبقاله ..... أغلى حبيب
قرب من روحه وكون له قريب
وقتها هايصدق .... انه نصيب
وانك للقلب .... حبيب وونيس
أنا قلبي رقيق اوي وف حاله
ياما كان بيقول ... عادي وماله
وأما إتأذى ...... م اللي جراله
إتحول قاسي كمان ،، وعويص
يبقى أنا ولا قلبي حجر صوان
انا قلبي ملان .....طيبة وحنان
لكنه اتأذى ........ كتير واتخان
من ندل جبان ياماقتله فطيس
✍️ Zenab Seleem