طبع وأصول/ بقلم الشاعرة زينب سليم أحمد
◇◇◇◇◇◇◇◇◇◇◇◇◇◇
عزة نفسنا ....... طبع وعادة
ليه تقولوا علينا بنتعالى .؟؟؟
ولا قولنا اننا يوم م السادة
ولا علقناكو ........ ف سيالة
بنراعي بس ...... اللي يراعي
وبنسعى للي .. يكون ساعي
اما اللي مالوش لزمة وداعي
دا بيبقى .. طرطور وعوالة
وعيوننا مهيش مكسورة لحد
بنعلم ع اللي .. اتخطى الحد
من ولادتنا ...... ولغاية اللحد
أفعال ... وماهيش بس قوالة
مجدعة ..... والكل شهد بيها
الهفوة ....... محال بنعديها
واللي لطباعنا .. يعاديها ..!!!
نعطيه من دنيتنا ....... إحالة
تلاقينا ف قول الحق نقول
ولا بيهمنا .. من غولة وغول
ويفوت الحول من بعد الحول
على نفس المبدأ ..... والحالة
واللي اتخطى معانا حدوده
تلاقينا .......... قده وقدوده
نكسر جذره ... ونحرق عوده
ويتوب لا آذية ...... ولا رذالة
✍️ Zenab Seleem
