الخلفة المايلة💥بقلم الشاعرة زينب سليم أحمد
💥💥 الخلفة المايلة 💥💥
◇□◇□◇□◇□◇□◇□◇□◇
عم نجيب ....... قام يفرك عينه
غلبان اصله ........... ربه يعينه
بعد سنين ..... محروم م الخلفة
رزقه بواد ......... طلعه من دينه
سيرته بقيت ، على كل لسان
مع انه ف حاله ........... وغلبان
ولا بيهش .............. ولا بينش
ولا كان له ....... في لف ودوران
طردوه عيلته ، أوام من داره
لما ضناه .............. قلل مقداره
واما الكل ............ عرفوا تمامه
جابوا كمان آخره ......... وآراره
خاب حتى ....... ف بلاد الناس
علشان سايقه ..... شيطان خناس
ولا يوم راعى ...... حرمة ودين
وسط الخاينين ،،، شرفه اتعاص
الواد عاش ....... يسرق ويهرب
مؤذي .............. لأيها حد يقرب
عالمال مسروع ... حتى الممنوع
تاجر فيه ......... قال إيه بيجرب
ولا بيراعي ......... جار ولا جارة
بقى مكروه ........ من كل الحارة
واما يحب يمشي كلامه .....!!!
يبدأ عاركة ........... ويعمل غارة
عم نجيب ............ عايش منبوذ
شال الهم ............. وضارب بوز
ابنه الملعون ......... حوله مجنون
من دلعه .............. خلاه أراجوز
عم نجيب ....... هلهول من يومه
ابنه الحيلة .......... باع له هدومه
لو كان يوم أدبه ...... من صغره
ولا كان عمر ........ الناس هاتلومه
دلع الواد ........... لو زاد عن حده
تجني سواد .......... وبيقلب ضده
قالوا زمان ............ الخِلفة المايلة
يلعنوا أبوه ........ وبيشتموا جده
بقلم الشاعرة / زينب سليم
