كان على عيني💥 بقلم الشاعرة زينب سليم أحمد
♡♤♡♤♡♤♡♤♡♤♡♤♡♤♡
بعت الدنيا .... بحالها عشانك
واتحملت ..... وقولت خلاص
كنت بشوف .... إنك بحنانك
كل الدنيا ،،،،،،،،، وتاج الراس
من بين كل الكون اختارتك
ريحتك ....... ولا يوم حيرتك
واما ألقاهم جابوا ف سيرتك
اقول دا حبيبي وسيد الناس
شوفتك نعمة ، وأجمل قسمة
دوبت معاك من نظرة وبسمة
قولت ربيع قلبي ... والنسمة
اللي هديتني أجمل إحساس
وأمنتك ،،،، على قلبي وعمري
واما لقيت ....... العمر بيجري
قولت ياريتني قابلتك بدري
وتكون عيني ،،، عليك حراس
بس زماننا علينا أهو جار ..!!!
ويوماتي في خناق ونقااااار
لما لقيتني ....... بقيت أحتار
واضرب أخماسي ف أسداس
كل يومين ، يتبدل حالك ...!!
مش فاهمة ... ايه اللي جرالك
واما أسأل وبقولك مالك ...؟؟
تقولي كلام ومالوهش أساس
بس لقيتك ....... جاي ف ليلة
تقول ف غرامك ، كنتي بخيلة
ولقيت واحدة .... ليكي بديلة
كات إبليس ،، وشيطان خناس
لفيت فجأة عليا ...... شباكها
وف روحي ، غرست أشواكها
ووقعت ف فخها ،،،، وشراكها
ولقيتني زيها ......... متعاص
روحت معاها ،،، في خبر كان
بس خلاص ،، فوقت وندمان
وراجعلك ..... بالشوق هيمان
استرضيكي .... ياست الناس
اللي فات اهو مات ،، وارتاح
واللي جاي ... هايكون أفراح
قال وعاوزني أقوله سماح .!!
كان على عيني ياسيد الناس
كان على عيني ياسيد الناس
✍️ Zenab Seleem
