رد إعتبار 💥بقلم الشاعرة زينب سليم أحمد
●■●■●■●■●■●■●■●
هو انت صحيح جاي بتسأل
وتمثل ............. إنك مهتم
بعد سنين ، ساكت وبتتقل
وكأنك تمثال ، وأصم ....!!!!
وانا اقول يمكن بكرة يحس
وانت مكمل ...... ولا بتحس
مش شايف غير روحك بس
وبسببك .......انا شيلت الهم
فكرت كتير ....... ألفت نظرك
واتخطى معاك كل حدودي
كنت يوماتي ....... اتبع أثرك
يمكن يوم ، تشعر بوجودي
وانت ف ملكوت غير الملكوت
مع نفسك مش بتطلع صوت
وكأنك عايش .... حالة موت
وبتسعى لبُعدنا ... وصدودي
ولقيتني تعبت ....... ومليت
والصبر اشتكى مني يوماتي
زي ماروحت لوحدي اجيت
عايشة ف حالي ، كل حياتي
واما ناداني ...... حب جديد
حس القلب ...... كأنه ف عيد
نسي أحزانه ......... والتنهيد
بدأت أحقق ........... أمنياتي
جاي دلوقتي تبين حبك .؟؟!!
وعامل فيها ، رومانسي كمان
واما لقيتني مشيت من جنبك
راجع تبكي وقال ندمان ..!!!!
مانا قبلك .. حسيت بالكسرة
واما لمحت ف عينك حسرة
حَسْت روحي ، بقوة ونصرة
نسيتني اللي أنا شوفته زمان
