مسك وورد 🌹بقلم الشاعرة زينب سليم أحمد
محال الدنيا تريح حد ..!!
ولا عندها رحمة ولا هزار
ياما بنينا آمال ، وتهد ..!!!
وعادي مكملة بإستهتار
وأما تلاقي طموحنا اتمد
تنسفهولنا ، يقع ينهار ..!!!
وقصاد كل أمل حيط سد
ليل أحزان ومالوهش نهار
عِندها طاغي وفاق الحد
قصفت بيه أحلام واعمار
بس عنادها نقابله ب عند
ونشق ف صحاريها أنهار
ايد بتحول رملها ورد
وايد بتبدل خوفها عمار
وقصاد كل ما باب يتسد
100 فدان قمح وأزهار
اللي يعيش ف الدنيا بجد
يعرف أنه مالوهش خيار
جدره يمده ف سابع أرض
كنه حويط ومالوهش آرار
بس ف قلبه بساتين ود
زرعة بتطرح نور وخضار
سيرة هتفضل مسك وورد
باقي عبيرها سنين واعمار
بقلم زينب سليم أحمد
