مكتوب ع الجبين 💥بقلم الشاعرة زينب سليم أحمد
◇□◇□◇□◇□◇□◇□◇
هانت وبانت ...... شراشيبها
وعاطلها لخبط .. فــ الباطل
وفــ شعرها ..... باين شيبها
توزيعه عمره ماكان عادل
لا تقولي بكره ...... ولا بعده
دا الظلم بقى ..... زايد حده
من كتره توهت انا فــ عده
والكل لمراري اتجاهل ..!!!!
هانت .......... وبانت ليبتها
وعرفنا رجلينا ....... وراسنا
عداله .... محبوسة فــ بيتها
لما طالبنا ... بميراثنا ...!!!!
من يومها واحنا دخلنا أنفاق
مافي بينا صلح . وأي وفاق
وان حد صحصح منا وفاق
قرصة ودانه بتخرسنا ..!!!!
نادينا ياما ...... وقولنا كتير
بس الودان من طين وعجين
لا ضمير صحي لغفير ووزير
واتساوى حر طليق وسجين
الكل معجون .... في همومه
كمل عشاه .... يومها بنومه
وقدره عايم .... على عومه
نصيب ومكتوب ع الجبين
بنهاتي لينا .... سنين وسنين
واحنا يادوب .. تحت الزيرو
بنرضى برضه ومش عاجبين
والصبر جبر مافيش غيره
يوماتي تتجدد ..... مواضيع
ملايين حقوقها معاها تضيع
واللي بيعلى . خاين ووضيع
عايشين .. على فضلة خيره
