خناقة 💥بقلم الشاعرة زينب سليم أحمد
💥💥 خناقة 💥💥
◇□◇□◇□◇□◇□◇□◇
الكوسة قالت .... للبتنجان
اتلم احسنلك ..... يامكبب
سايق فيها تملي وفرحان
يا مكعبر يا ابو وش مهبب
قالها مالك بيا ياسوسة
بتركزي ليه ويا أسيادك
ولا علشانك ...... موكوسة
من ايام اجداد .... أجدادك
ولا بقينا فــ زمن الكوسة
والعصر الذهبي لأمجادك
دي العالم منك مفروسة
واللعنة هتصيب احفادك
وشها م الغيظ حول ألوان
وقالت له اخرس ... يامبذر
راح تعمل فيها خُلل وجنان
وفاكرني هطبطب وهاهزر
دانا اسلخ جلدك ... واقليك
ولا هايهمني .. منك يامفش
ابعد عن وشي الله يهديك
انت مش قدي ياواد فالنكش
قالها اهدي شويه ياكوسة
على ايه سيقاها دلع أو مرع
عملالي صغننة ننوسة ..!!!
وانتي ياعيني زلابطة وقرع
طب وحياة امي وابويا غنوج
لتشوفي ... حجمك ومقامك
يام التقويرة ... وسير معوج
ولاعمري اكون يوم خدامك
✍️ Zainab Selim
