اصحى ياشاطر 💥 بقلم الشاعرة زينب سليم أحمد
◇■◇■◇■◇■◇■◇■◇
كان حزين مكسور مسلم
شافني يومها وجاني سلم
قالي أهلاً ...... قولت أهلاً
اتلاقيته ..... وقف لي بلم
قالي أنا ...... مغرم صبابة
جاي أحميكي .... م الديابة
مانتي نغمة ....... ع الربابة
سحرها ...... فــ القلب علم
وعمل فيها الواد نحنوح
اتنهد ..... قال ايه مجروح
واتقمص دور .... الابنودي
يكتب لي فــ شعر ويبوح
فكرني بقوله ..... اتهزيت
أو سخسخت أنا وحنيت
وميعرفش اني اتخضيت
من سحنته ابن المفضوح
هو عشاني كنت رقيقة .؟؟
أو من وقتي اديته دقيقة
ولاعشاني قولت أساعده
لما حلفلي .. بإنه فــ ضيقة
يبقى يهب بعقله ويسرح
ان بقاله مكانة .... ومطرح
ويفكر ... واقف ع المسرح
واني ساذجة وبت بريئة
اصحى ياشاطر حبة وفوق
إعقلها بحكمة وبهدوووووء
واماتعيش ..... دور الحبيب
يبقى بلاها ..... تبص لفوق
اختار اللي ... عليك هاتليق
وبلاها ......... شغل التلزيق
ولا انت بتهوى .... التهزيق
وتقول قسمة عليه ونصيب
