شرنقة الروح 💥بقلم الشاعرة زينب سليم أحمد
💥💥 شرنقة الروح 💥💥
◇□◇□◇□◇□◇□◇□◇
ياللي عايش .... ع الأطلال
وعامل فيها ... طويل البال
مين قال انك عايش سنك
دانت اكمنك ... صبرك طال
كل الناس كات جاية عليك
ومحسش ولا مخلوق بيك
وبتتحمل ........ كل مافيك
عشمان ..... تتبدل الأحوال
عيشت الحلم اوام صدقته
واتخيلت انك حققته ..!!!!
مخنوق جوا جدار شرنقته
وبتكدب .. وتقول كدا عال
كل الدنيا بقيت ماتساعك
وماحدش حس بأوجاعك
اللي شاريته بعمرك باعك
وطلع ندل ..... من الأندال
عمرك راح ..تحت الأنقاض
وان جه يوم .. الفرح اتعاد
يتحول فــ ثواني حداد .!!!
وزمانك .... على قلبك مال