عالم فلصو 💥 بقلم الشاعرة زينب سليم أحمد
💥💥 عالم فلصو 💥💥
◇□◇□◇□◇□◇□◇□◇
غش وطبل ....... يالا ونافق
تتفتح لك ........ ياما مرافق
واما تكحكح ..... أو تتنحنح
تلقى الكل عليك .... اتسابق
لكن لو هاتقول ......... الحق
يتفتح لك مليون شق ..!!!!!
وبشلوط فيه ..... راح تتزق
ويقولوا عنك بيئة سوابق
سيبك من قولهم وكلامهم
ولا عتابهم ليك ... وملامهم
وماتتغرش ... يوم بسلامهم
ولا بصحبتهم ....... تتعايق
هاتشوف منهم ياما كتير
سيىء سمعة ومعوج سير
بيقولوا عنه ..... برنس كبير
ويقوموا علشانه حرايق ..!!
وسط حريم ... تلقاه بيتدلع
لو تتجاهله ....... بتلقاه ولع
شايب واسنانه ...... بتتخلع
وبطقم اسنانه بيتعايق ..!!!
عالم فلصو .. كناسة وقشرة
لابيعرفوا أخلاق ..أو عشرة
أشكال عيرة بوشوش كشرة
ابليس لوشافهم يتضايق .!!
