ليالي رمضان ♡ بقلم الشاعرة زينب سليم أحمد
◇■◇■◇■◇■◇■◇■◇■◇
الناس اللي بتفطر .. وتقوم ..!!
تجري ع الندوة ف شهر الصوم
وكأن غيابهم ... ذنب كبير ..!!!!
وحضورهم فرض عيان محتوم
ظابطين ندواتكم .... والتفاريح
وقت عبادة ..... وصلاة تراويح
وكأن شيطانكم .......... ملاكم
وكتبتوا معاه عهد ... وتصاريح
ماالندوات كانت .... طول العام
وبتزرعوا فيها ..... حقول آلغام
ربنا صفد ....... كل الشياطين
قولوا لشياطينكو دا شهر صيام
اختشوا واتداروا ف شهر الصوم
دي ذنبوبكم طول العام بالكوم
منحة وعطية ....... رب كريم
واللي استهتر هايكون محروم
هاتلاقي الكل ......... بيتشدق
ومفكر قوله. ........... بيتصدق
عن لم الشمل ......... مع العيلة
مع انه سايبهم ... ومفلق ..!!!
أقوالهم بتبان ......... مثالية
وكأنه ملاك ..... هو وهي .!!!!
وبكل بجاحة بينصحوا فيك
بنصايح فيك ..... خيبة قوية
ودي أمسية .. وليالي رمضان
الكل بيحضر .... جاي عشمان
وكأنه طول اليوم مكبوت .!!!
وف اخر اليوم جاي للروقان
خليكو ياعالم ....... قدوة خير
هاتلاقوا ثوابكو عظيم وكبير
مين قال الايام تتعوض ..؟؟؟
أو ضامن لسة باقي له كتير ؟!
