تعالى نتصالح ❤️ بقلم الشاعرة زينب سليم أحمد
◇□◇□◇□◇□◇□◇□◇
تعالى انا وانت نتصالح
وننسى اي قول جارح
ونرجع تاني نبقى احباب
ونقلب صفحة .. امبارح
تعالى انا وانت نتصافى
لصالح مين بنتجافى ؟؟
نداوي قلوبنا زي زمان
بنظرة وبسمة .. نتشافى
تعالى عاتبني واعاتبك
نسمع صوت قلبي وقلبك
بلاش العند .... يتحكم
وتكسر قلب .. يوم حبك
تعالى وهات معاك روحي
انا فــ البعد .. طال نوحي
وعزة نفسي ..... منعاني
لكن قلبي ... يقول روحي
تعالى ياعمر ... راح مني
تعالى أوام ...... وطمني
وحتى بلاها لوم وعتاب
مدام ضمناك .. وضامني
انا فــ البعد زاد وجدي
لا حال ولا وقت بيعدي
ولو حواليا ... كل الناس
لكن برضه بكون وحدي
تعالى حبيبي ..... بزيادة
دي نار اشواقنا متقادة
وقلبي ربيعه جف نداه
وألوانه ....... بقيت سادة
نبض القلب ..... مابينساك
فــ عز الليل ...... بيندهلك
ورغم القسوة .... بستناك
ورغم فراقنا .... بشتاقلك
✍️ Zainab Selim
