بث مباشر ◇ بقلم الشاعرة زينب سليم أحمد
◇■◇■◇■◇■◇■◇■◇
ياللي بتخاف ... م العيون
وبتشكي وتعلي ف صيتك
وانت يومياتي بالتليفون
البث بتفتحه من بيتك .!!
وبتشرح للناس تفاصيلك
مين بتعيله ، ومين بيعيلك
واما مصيبة آوام بتجيلك
دوغري تولول لجل نغيتك
تافه ...... زي التافهة تمام
نفس الفكر ونفس النوع
تلقاهم ....... دايما ع العام
بيفبركوا .... أيها موضوع
لجل تزيد اعداد لايكاتهم
بيصدعوا روسنا بحوارتهم
والمجمل بتشوف حكايتهم
حربوقة وشاركت جربوع
بيصور لقمته ، وعياله .!!!!!
وايها نعمة عليه بتجود
لو إسهال بعدها يوم جاله
تلقاه دوغري يقول محسود
ويحسبن .. على كل الناس
بالصمدية ..... ورب الناس
الصبح يقول توبة خلاص
بعد الضهر ... لايف موجود
اعقلوا حبة ..... انت وهي
واقفلوا بابكم .. والشبابيك
ولنفسكو اعملوا خصوصية
وبلاش فُرجت خلقه عليك
خفوا شوية . لجل تعوموا
سبحوا ربنا صلوا وصوموا
لو حوالين النار هاتحوموا
لسعتها ... هاتطولها ايديك