بيقول هانتخاصم بقلم الشاعرة زينب سليم أحمد
◇■◇■◇■◇■◇■◇■◇■◇
البيه بيقولي ....... هانتخاصم
وتملي مقموص ..... ومخاصم
يبقى الغلطان وكمان زعلان
وعامل سهراية ومراسم ....!!!
بيروح ويطول ........ بالأيام
ومفكر هاسهرله ..... وماهنام
وانا 100فل ومبسوطة تمام
وقرار بعدي ... نهائي وحاسم
بسلامته م الصبح ..... ناويها
عمال يحكي ..... وانا اعديها
جارة أهله ..... واقفة تشاغله
وكمان بتسبل .......... بعنيها
وحيلتها ....... فرحان بشبابه
ويوماتي هناك ... عند أحبابه
طب ليه بيحكيلي وايه جابه
اسمع حوراته ....... وبلاويها
اصبر يامسهوك ... يا منحنح
وحياتك لتشوف ...... وتتنح
لوقولت تعود راح اقولك عود
من غير ولا افسر ولا هااشرح
إتهنى بقى .. بــ سوسو ولولو
ولا راح يفرق ..... مهما تقوله
ورجوع تاني مش .. هاتطوله
وحذاري ....... ترجع وتوضح
مش هاتشرف لو ندل خسيس
يتقرب مني ... ويبقى عريس
مهما اتسبسب .. ولا اتسرسب
ولا مشاعره .. شلال وهاويس
دا اللي اتعلمناه من سنة أولى
ان الجدعنة ..... شرط رجولة
وتكون شخصية .... ومسئولة
مش تغرق ... وتغرقنا فطيس
✍️ Zainab Selim
