كدابين زفة ♡ بقلم الشاعرة زينب سليم أحمد
كدابين زفة
◇■◇■◇■◇■◇■◇■◇
أهالينا ....... قالوها زمان
إن الشدة .... ليها جمال
يبان فيها البشر الألوان
اصيل الطبع .... والأندال
تلاقي اللي ...... بيتشفى
وفيهم ...... كدابين زفة
وضحكة بخبث ع الشفة
تزيد الهم ....... والأحمال
وتلقى أيادي ... بتطبطب
وحزنك هو ... حزنه تمام
لا يرغي كتير ولا يخطب
وفعله حقيقي مش بكلام
يشيل الدنيا ...... يهبدها
وهمومك ........ يحددها
ودين الناس .... يسددها
لجل تعيش برضا وسلام
يبقى ياصاحبي ... تتأنى
وتختار صح ..... م الأول
جدع يبقالك ....... الجنة
مش غدار ....... بيتحول
بلاش تحكم .. وتستعجل
دا ياما قلوب .... بتتبدل
يبقى تشوف ... وتستعدل
بخبرة أهل ....... عامنول
